Мадрид го смирува Рабат, но го провоцира Алжир

За целосно да се разбере што е загрозено во оваа регионална криза, мора да се вратиме на последните часови од мандатот на г. Доналд Трамп. На 10 декември 2020 година, американскиот претседател го призна суверенитетот на Мароко над Западна Сахара, при што кралството вети дека за возврат ќе ги нормализира односите со Израел. Ниту една друга западна сила не го презеде овој чекор и оваа одлука го охрабри Рабат. На 15 јануари 2021 година, г. Насер Бурита, мароканскиот министер за надворешни работи, ги повика европските земји да ја напуштат својата „комфорна зона“ земајќи инспирација од американскиот пример. Дотогаш, само Франција го поддржа планот за автономија предложен од Мароко за решавање на конфликтот во Западна Сахара. Но, Париз никогаш не отиде толку далеку да го признае мароканскиот суверенитет над оваа територија како што тоа го направи Белата куќа.